КАФ-ФЕД-м и VIII-нэ зэхуэс
2017 гъэм щэкIуэгъуэ (ноябрым) и 26-м Тыркум и къалащхьэ Анкара щекІуэкІащ Кавказ хасэхэм я зэгухьэныгъэ КАФ-ФЕД-м и VIII Конгресс.
Абы кърихьэлІахэщ КАФ-ФЕД-м хэт хасэхэм я лIыкIуэхэр, Тыркум щытет партым, нэгъуэщI партхэми я лІыкІуэхэр, къалащхьэхэм я унафэщIхэр.
Апхуэдэу Зэхуэсым хэтахэщ Абхъазием демографиемкІэ и IуэщIапIэм и тхьэмадэ Дбар Беслъэн, Адыгэ Республикэм щыIэ Адыгэ Хасэм и тхьэмадэ ЛIымыщIэкъуэ Рэмэзан, Дунейпсо Адыгэ Хасэм щыщ ЦIыкІушэ Аслъэн, Краснодар щIыналъэм щылажьэ Адыгэ Хасэм и лIыкIуэ Сэхъут Аскэр, Абхъазым щылажьэ Адыгэ Хасэм и тхьэмадэ АфІэунэ МуІэед, Европэм щылажьэ Адыгэ Хасэхэм я Федерацэм и тхьэмадэ Догташ Эртан, Иорданием щыIэ Адыгэ ФIыщIэ Хасэм и тхьэмадэ Зухьди Жанбек сымэ, нэгъуэщIхэри.
Илъэс блэкIахэм яхузэфIэкIахэм, зыхуэза гугъуехьхэм, абыхэм хэкIыпIэ яхуэхъуну къалъытэхэм щытепсэлъыхьащ зэхуэсым.
Асланкая (Хьэгъундокъуэ) Яшар псоми я зэгурыІуэкІэ аргуэру КАФ-ФЕД-м и тхьэмадэу хахыжащ.
ПщIэ зыхуэтщI Яшар!
Дунейпсо Адыгэ Хасэм и ГъэзэщIакIуэ гупым хэтхэм я цIэкIи си щхьэкIи гуапэу сынохъуэхъу Тыркум щызэхэт Кавказ жылагъуэ зэгухьэныгъэхэм я федерацэм и тхьэмадэу узэрыхахам папщIэ!
Кавказ жылагъуэ зэгухьэныгъэхэм я федерацэми Дунейпсо Адыгэ Хасэми я лэжьыгьэм жыджэру ухэтщ. ДяпэкIи адыгэбзэр, хабзэр, лъэпкъ культурэр Тыркум щыхъумэным, хэкурысхэмрэ хэхэсхэмрэ зэпыщIэным хэплъхьэ гуащIэдэкIыр нэхъ ин хъуну, ехъулIэныгъэшхуэхэр уиIэну, уи лэжьыгъэм и хъер плъагъуну Тхьэм жиIэ!
ПщIэ къыпхуэзыщI, Дунейпсо Адыгэ Хасэм и Тхьэмадэ Сэхъурокъуэ Хьэутий
